قلوب بلاملامح

:: ق ــلوب بلآ ملامــ ح ::

،
،
~)(~ البدايه ~)(~
.
.
من لحظة رحيلك يا بويه..
وأنا أشتكي قسوة الغربة..
وجفـاف قلوب الأحبـة..
.
.
[ نيويورك.. 9.37 مساءا ]

صرخات تترعرع بالألم.. والاحزان بين طياتها احلام متهدمه وقلوب ضايعه..
.."باباااااااا.. لاء لا تتركني يا بابا .. مالي غيرك فــ حياتي .. لا تخليني وحيده!"
..(بالإنجليزية) : ماذا تقولين يا فتاة.. ولماذا تصرخين هكذا بالعربية.. تكلمي بالإنجليزية!!
... :انقلع أنتا .. أبغى بابا أبغاااااه..!!
..(بالإنجليزية) : على العموم يا فتاة أبتعدي عن هنا، والدك يوشك على الموت..!
أنقهرت منه.. "هذا أيش بو يقولها بشكل عادي ولا كأن ساير شي.. اشبه هذا!!.. أبويا هذا حياتي .. هذا تاج راسي في حياتي.. هو دنيتي وسعادتي مهي إلا معاه.. ولا يمكن أعيش من دونه لا يمكن لا يمكن لا يمكن.."
دفته بأقوى ما عندها.. وهي تشهق من وسط دموعها، ودخلت الجناح إلي موجود فيه أبوها
شهقت بعد ما شافت حال أبوها .. ياالله قد إيش حالك تعصر قلبي .. خلاص أنا بنتهي خلاص خلااااص.. وراحت جمبه مسكت يده بشويش جلست تتحسسها وهي تبكي بالمووووووت خلاص أنا منتهيه من بعدك... مين بقا لي بالحياة.. ياااربي أرجوك ياالله أكتب لبابا السلامه رجعه لي يااارب مالي غيره بعدك في الحياة..ياااارب يااارب
كانت تبكي بشكل متواصل لمدة نص ساعه وبعدها حست أصابع ابوها تتحرك ما صدقت!!
... : "بابا ...حبيبي.. رد علي.. طمني إنك بخير!... بابا؟"
حست أنها تتكلم للاشي بعد ما قعدت عشرين دقيقه تنادي عليه وما رد عليها.. حطت راسها جمب كتفه وهي تبكي ..
... : " آآه يا زمن آآآآه إش أسوي بعدك يا تاج راسي إش اسوي ..علمني وين أروح علمني كيف أعيش من غيرك .. لا تروح قبل لا تعلمني... يا بويا علمتني على السعاده معاك.. يا بويا نسيتني الغربه ونا معاك.. كل شي كان في عيني حلو وأنا جنبك.. ما كان في خاطري إنو يجي اليوم إلي أفقدك فيه..(وبعدين شهقت بقوه) بس يا بابا ما علمتني الحياة بدونك .. ما علمتني كيف حأعيش بعدكــ...! "
حست مره ثانيه بأيده كلها تتحرك وتتحسس خدها..
وصوته يقول بونين..:" وأنتي الصادقه يا بنتي .. ما أمنت مستقبلك بعد رحيلي"
شهقت بقوه..: بابا! .. إنت بس قاوم لا تروح عني.. ما أقدر أعيش بدونك... أنت أبغاك.. أنت.. من دون الناس أحتاجك يا بابا أحتااااجك..
أبوها بكلام مقطع وتعب: (وعــد) يا فرحتي في الحياة .. يالبسمه إلي أشوف منها السعاده تجريلي..(وهنا دمعت عينه) هذي غلطتي إني هجرت الأهل وجبتك هنا توقعت إني حأبنيلك مستقبل.. وما أخليكي تحتاجي لأحد بعدي..
وعـــد تقاطعه بحنان: بابا لا تتعب نفسكـ.. خلاص إنت حتقوم إن شالله..وما راح أحتاج إلا لك..
... : stop to speak..ستتعب أكثر.. you outside now وإلا ستتسببين في وفاة أبيكي ومن ثم الخطأ علينا لأننا تركنــ...
أبوها بصوت ضعيف يقاطعو (بالإنجليزية) : يكفي.. دعها .. لدي كلام معها..أنا ميت لا محاله!!
طالع عليه الدكتور شوي .. بعدين خرج وهو يتأفف من عناد الأثنين وتمسكهم في بعضهم وبنفس الوقت أستغرب .. "هل من المعقول وجود فتاة تحب أباها بهذا الشكل ... وأب متمسك بإبنته لأخر رمق!!!!!!"
بعد ما خرج الدكتور قربت وعــد من ابوها.. وهي تطالع فيه بنظرات ما تشوف منها .. بسبب تكدس الدموع فيها..
وعــد وهيا تحاول ترسم الابتسامه على شفايفها ولو إنها جات باهته بس توفي بالغرض: بابا .. بليز لا تجيب سيرة الموت.. بإذن الله تتعافى وترجعلي طيب..
مسح أبوها على راسها وهو يطالعها بقهر وندم "ليه ما أمن مستقبلها ليه؟؟.. ليه ما فكر بذا اليوم بنته ما تعدت الـ19 كيف بتعيش بهذي الغربه وحيده .. ولو حترجع السعوديه مين حيساعدها وكيف ترجع وحيده.. أصلا ما راح تعرف تتصرف وما معاها رجال".. وتعب من هالتفكير أصلنه مو ناقص صداع.. كملت معاه.. وخرجت من فمه تنهيده قويه و.."آآآآآآآه" تقطع القلب..
وعــد: بابا سلامتـــك .. إيش فيـــــــــك ؟؟
رجعله تأنيب الضمير.. "يااااربي كيف أتصرف لازم قبل لا أموت أسوي لها شي لاااازم يااارب محتاجك ساعدني يااااارب.. أنا تعباااااااان تعبااااااااااااان ما ني قادر أستحمل أحس روحي بتطلع.." وفجأة نقزت في عقله فكره..
أبوها: "ياااللــــه ليه ما فكرت فيه من أول!"
وعـــد بخوف: مين هوا ياا بابا.. إيش تقصد..؟؟
أبوها: وعـــد تفتكري ولد عمك ..؟
وعـــد بدهشه وقلق في نفس الوقت: بابا ما عندي ولد عم..
أبوها: إلا ..... سامـر!
أرتجفت وعــد وهيا خلاص ما هي قادره تفكر .. "سامر سامر سامر ....آآآآه سامر ما غيره ذاك الولد الغريب إلي ما شفته من قبل عشره سنين .. وإنقطعت أخباره من ست سنين.. إبن العم.. الغامض..! إلي محد فهمه ولا يمكن أحد يقدر يفهمه..سامر إلي أكثر العيله تكرهه وتقول عنه غريب أطوار.. سامر إلي الكل يدعي عليه ويقول إنه إنسان رامي كل شي وراه وما يهمه شي.. يوه إش فكره أبويا ألحين فيه ... إيش فيه!!"
قطع عليها أفكارها صوت أبوها الضعيف: وعــد , سامر يسكن هنا..
وعد بدهشه ومفاجأة ما توقعتها: إيــــــــــــش!!!.. فين هنا ؟؟
أبوها بصوت يا دوب ينسمع: نيويورك
وعــد بدون تصديق: بابا .. معقوله !! سامر ساكن هنا... في نيويورك!!!!
أكتفى أبوها بهزت راسه بشكل إيجابي ..
راحت الأفكار وودت وعــد يمين و شمال.. ونست أبوها ومرضه.. "كيف؟ يؤ هنا معانا في نيويورك وفينه ما شفناه.. بابا ما افتكر إلا ألحين!! يؤيؤيؤ لا يكون قصده يكلمه يجيني لااااا يااااربي لااااااااااا .. أنا سامر أكرهه ما أطيقه ذاك الولد إلي كان دايما يضايقني أنا والبنات كان يكرهنا ويقلنا دايما .. [أنا أكره شي أسمه بنات]...عنده [البنت ترتبط بالدموع.. بالضعف].. يؤ معقوله يجي يساعدني أصلنه ما يساعد أحد كل العيله تقول كذا.. يااااربي إيش المصيبه إلي أنا فيها لاااا ياااربي كرامتي حتروح إذا طلبت منه يساعدني لااا أنا ما راح أخليه يدوس كرامتي ذاك الحقير إلي ما في أحد يحبه.. الشراني... !!"
أنتبهت لأبوها يتألم..وهو يدنق لمحفظته.. ويفتش فيها.. وعيونه ترتفع لثواني تطالع وعــد وترجع للمحفظه بسرعه يدور والتعب يزيد عليه.. والآهااات تخرج بقوه منو...!
وعــد: بابا لا تتعب نفسك أرتاح يا بابا أرتاح الله يغنيني عن الناس أنا ما احتاج إلا لك..
أبوها بعد نظره حنونه لبنته: وعد.. والله خايف من الايام وش بتسوي فيكِ
وفجأة شهق بقوه.. خلاص تعب ما في يده حيله.. ما يقدر يكمل يااللــــــه وبنتي مين يرعاها بعدي ميــــن؟.. وين الرقم!! يااارب.. آآآه هوا هناك..
أبوها: وعد .. تعرفي الجاكيت الرمادي المحطوط بالخزانة..؟؟
وعد وهي تشهق من البكا: ايوه يا بابا أنا شلته ونظفته لك و....
ويقاطعها ابوها بصوته والأنين يصارع كلامه: نظفتيـ ـ ـ ـه.. ما لقيتـ ـ ـي.. ورقة صفره ..صغيـ ـره!!
وعد وهي ترتجف: إلا .... وحطيتها في مكتبكـ .. بابا خلاص أرتاح..
خلاص أبوها تعب بالمره وفِضل يكح بقوه وشهق.. ونادت الدكتور إلي جا يبرطم ..
الدكتور (بالإنجليزية): لقد قلت لكما .. وأنتما عنيدان!.. تباً!
وعد (بالإنجليزية): يكفي .. إفعل الآن ما عليك..
طالع عليها الدكتور بنظرة حقد.. وبعدين نادى طبيبين معاه وحاولو مع أبوها بـــــس الظاهر خلاص جات لحظة أبوها.. دقايق تمر مثل الساعات.. ثقيله.. بطيئة و وعــد بره تنتظر وهي تبكي..
راحت تجري خلاص ما هي قادره تصبر.. تبا تنفجر من التعب وأعصابها فلتت.. دقت الباب ودقت ما لقت مجيب.. دخلت وشافت الاطباء يحركوه لغرفة الإنعاش.. يؤ خلاص يعني خلاااص بابا بيموت!!!
لحقت وراهم وهي تبكي.. وتشوف نظرات ابوها عليها ما فارقتها من ساعة ما دخلت الغرفه وكأنه بيقول شي.. أشر عليها تقرب.. راحت منصاعه لأمره بسرعه .. حطت أذنها قريب من فمه.. وتفاجأت به يقولها..
أبوها: وعـ ـ ـد أمنتـ ـ ـك بـ الله تتصلي... علـ يـ ـه ..رقمـ ـه في ذيـ ـك الورقـ ـه.. هـ ـذي وصيتي لك..
وعد خلاص أنتهت مهي قادره تتحمل طاحت ع الأرض .. منهاره .. بابا بيروح.. توه قالي وصيته .. خلاص بيروح عني.. خلاااص..!
وصارت تهمس زي المجنونه وهي تهز راسها : لاااا لااااا لااا لاء لاء لا لا لا لااااااا لااااااا
جاتها وحده من الممرضات وأخذتها .. أدت لها مهدئ.. وبعض الكلام إلي مر مثل الهوا عليها ولا اهتمت له..
جاها الدكتور وقالها إلي كانت متوقعته..
تحس نفسها مخنوقه مهي قادره تتنفس.. بين يوم وليله سبحان الله أبوها راح عنها..!!
. .
مهي قادره تسوي إي شي تعبت خلاص .. راحت للشقه مهلوكه مهي قادره تمشي.. ساقت سيارتها وهي شبه ميته.. "زمن الحياة الحلوه راح عني خلاص أنا ألحين وحيده بهاذي الدنيا..بابا مات وحيرسلو جثته لجده محل ميلاده.. مدري إذا كان أحد بيهتم بيها أصلا الكل ما يحب بابا لأنه تركهم كلهم وعاش هنا صحيح كان دايما يتصل فيهم وخاصة بخالي.. إلي أتوقعه الوحيد بيهتم فيه.. هه ليه كرهت سامر الي ترك الأهل مثل ما سوى بابا.. يعني ايش الفرق؟؟.. بـس كان بابا يتراسل مع بعض الأهل وهو.. بالمره أختفى.. آآآآه وش لي أنا بهذا التفكير.. خليني ألحين أفكر بمصيبتي وفراق الحبيب الغالي التاج إلي كنت أتفاخر فيه.. وحأفضل أتفاخر فيه.. حتى بعد موته.."
وصلت العماره ، كانت تطلع وما تدري كيف قدرت توصلها.. وهي بهاذي الحاله.. بالقوه مسكت يد الباب .. حطت المفتاح بيد مرتجفه.. "آآخ يا بويا.. كيف حأدخلها وأنت منت معايا.. كيف أفتح نورها بعد رحيل نورك..ياالله أسألك أتثبتني.. ولا حول ولا قوة إلا بالله.."
كانت مظلمه وكئيبه، بعد موت أبوها ما تتوقع سعاده بترفرف عليها من بعده..
ماتت من بعد موته...
انتهت بعد ما انتهى...
روحها رحلت من بعد رحيل روحه...
. .

عشت السعادة بين يدينك..
ومالي في هالكلمه من بعدك..
فارقت عني والدموع مدرار..
يا بويا ليه ما نتبادل الأدوار..
وأروح أنا وتبقى أنت سعيد..
كفايه علي أرحل للأبـد..
بعدما أشوف البسمة فيك..
ومشاعرك علي مثل السيل..
بس إنت يا بويا لا ترحل..

.
كانت تتأمل صورته وتتحسسها.. "ياالله يا بابا لو كنت جنبي ألحين نضحك سوا.. نلعب سوا.. أتذكرك يالغالي.. كنت لي الأب والأم والأخو والأخت والصديق و الحبيب... كنت كل شي بالنسبه لي..
بعد ما نسيتني كل الألم.. وعرفتني عـ السعاده.. وجعلت لي موطن في أعلى فندق فيها..
ترحل وتخليني .... وحيـــــده..؟!"
..
مرت عليها ثلاثة أيام وهي ما تطلع من غرفتها إلا لغرفة أبوها تجلس فيها شوي وهي تبكي.. ومن تحس نفسها خلاص ما تقدر تتحمل جلوسها فيها.. ترجع لغرفتها .. ما يدخل بطنها إلا المويه.. وجهها صفر وجسمها ذبل..وحتى الوقوف والمشي سار صعب عليها.. ما كان القران يفارق حظنها .. كل شوي تقرا فيه.. تصلي ركعتين آخر الليل وبعدها تهدى وترتاح..

، ،
]ان شاالله اشوف اردودكم
يا ترى من هي وعد؟؟
وهل هذي بداية قصتها وبداية مأساتها؟؟ والسؤال هل حتكون هذي كمان بداية ضياعها؟؟
ومين هذا سامر وايش قصته؟؟ وهل وعد حتلجأ له؟؟
وإيش إلي بيصير لها إذا رجعت لأهلها عن طريق سامر أو غيره؟؟
قلوب تتكسر ومشاعر تتبعثر.. وضياع أتي من غير استئذان... تابعو معايا الاحداث في تطور.



~)(~ الفصل الاول ~)(~
عذبتني.. وأجبترني "ظروفي".. أتجرع موت الشموخ من يدك..
بعد مرور أسبوع من وفاة أبوها.. كانت على سريرها.. شبه نايمه.. الساعه 2.03 الظهر.. قامت تدقق عـ الساعه .. "أوف ما صليت الظهر".. أفتكرت أبوها وهو دايما يوصيها ..[وعــد إلا الصلاة.. إلا الصلاة.. وها يا وعــد الصلاة في وقتها..]..
مسحت دمعة نزلت وقامت وراحت عـ الحمام توضت وصلت الظهر.. ودعت ربها إنو يفرج همها وما يتركها تعاني..من الوحده .. قرأت شوي من القرآن إلي شرح صدرها..
وبعد ما خلصت.. راحت أخذت لها زبادي وعيش.. ما خلصته علشان نفسها مسدوده مع أنها جيعانه! .. راحت تجلس على الكنب فتحت التلفزيون ورجعت قفلته وهي متضايقه...

فجأة تذكرت .. ... "يوووه كيف نسيت!!... وصية أبويا... (مسكت راسها) .. يااللـــه يعني لازم ... لااااازم ألجأله.. يؤ شكلي مجنونه.. كيف ما ألجأله,, وأنا وحيده في بلد أجنبي.. أخاف أكلم أي أحد بالنهايه الكل هنا لا هم عرب والمصيبه ما هم مسلمين.. ما أقدر ألجأ لهم.. يعني مالي غيره..!!"
راحت وهي ميته قهر.. تمشي وتحس إنها إنسانه سارت ولا شي في الحياة.."إيش إلي خليني أبحث عن حياتي ليه خايفه على نفسي.. وأدور إلي يحميني ويساعدني.. يؤ مجنونه أنا..؟؟ (سامر) يحميني .. (سامر) يساعدني .. هيه شي يضحكـ!!
الأنسان إلي طول عمره وأنا صغيره كان يأذيني .. ويطنش أي شي أسويه ولا كأنه شي.. أووف ..هه وأنا إش لي فيه.. هوا بس حيساعدني في رجوعي للبلاد ومن هناك بروح لخالي محمد ما لي غيره..!"
وصلت عند مكتب أبوها.. طلعت الورقه الصفرا.. "هيا هاذي.." جلست تقريبا نص ساعه تطالع في الرقم..!!
"أوووف إيش إلي يرميني عليك.. وربي مجبوره.. مجبـــــــــــوووره..!"
جلست على الكرسي قدام المكتب.. راحت تتلمس المكتب حست.. نفسها خلاص ملت الدموع .. لو بكيت زياده حتموت .. ما تقدر تتحمل..رخت راسها على ورا.. رجعت طالعت في الرقم .. وبعدين رجعت على ورا..
تتذكر ذاك اليوم زماااااااان قبل عشر سنين بالزبط... لما كان عمرها تسع سنين.. كان يومها جمعة للأقارب..

. . . . . . . . . . . . . . !

... : "وااااو فستانك حلو يا وعد..! "
وعد وهي خجلانه: شكرا يا حسام..
تدخلت سمر بحماس إلي عمرها 8 سنين: روعه ماشالله من فين اشتريتيه..
وعد مبتسمه: بابا جابو لي هديه (وهي تنط بفرحه) ومفاجأة..
سمر بغنج طفولي: مممم بابا ما يجيبلي مفاجأة ولا هديه!.. لازم أقعد أزن على راسو عشان يشتريلي..!
حسام إلي عمره تقريبا 13 سنه ..قال وهو يضحك: وإنتي مشالله عليكي ما تقصرين.. وأصلا حتى لو لبستي مثل وعد.. ما راح تكوني حلوه.. عشان هي أحلى منك!..(وطلع لسانه لها)
سمر تبا تبكي: ليه أنتا دايما كذا ما تحب تمدحني .. بس تمدح وعد..؟؟
... : "هوا في شي حلو في وعد عشان تنمدح؟!!"
تفاجؤ كلهم بــ سامر داخل الحديقه إلي عمره كان ذاك الوقت ما تعدى الـ14سنه..وراحو يطالعون فيه ساكتين وهو يكمل.
سامر: وبعدين إنتي هاي أسكتي بس تبكين .. تراكي رجيتينا!!.. (ووجه كلامه لحسام) .. حسام متى تترك البنات الخبلات هذولي.. وتجلس مع الرجال..؟؟
وعد طالعت في حسام حسته أتضايق وراح يطلع من الحديقه.. وفي نفس الوقت سامر أتحرك يدخل جوا الفله.. يبغاله حاجه..
عصبت بالمره وهي تعتبرها إهانه لولد خالها حسام.. إلي تعتبره أعز أخو وصديق..
وعد وهي رافعه راسها وبصوت عالي تمثل فيه القوة.. وبلهجه طفوليه: هاي إنتا إشبك طول الوقت بس تحب تضايق الناس؟؟
ألتفت لها سامر بهدوء وأبتسم يتمصخر عليها: أقوووول ما كأنك شايفه حالك شوي..!!
ما عرفت وعد ترد سكتت وعصبت وبغت تبكي ..:..!!!
سامر وبطريقه تنرفز: اقووول يالذبانه ما عاد تتدخلي في شي إنتي منتي قده ..!!
أكتفت وعد إنها تقول بصوت راخي ما ينسمع: شرير..!
سامر سمع الكلمه وهو راجع بيدخل بس ما أداها أي أهتمام..
قعدت تطالع الباب إلي دخل منه وهي متنرفزه وحاقده عليه..إلين ما سمعت سمر تقول..
سمر: ليش سامر ما يحبنا؟؟
ألتفتت لها وعد وقالت وهي معصبه: هوا أصلا ما يحب أحد.. ولا أحد يحبه..
سمر: ليــــش؟؟
وعــد ببرائه: لأنه شرير..

. . . . . . . . . . . . . . !

أبتسمت وعد لما تذكرت سمر وهي مرعوبه منو.. "كانت يا زينها..! و..حسام يا حليله.. ربي يسعده ويسعدها وحشوني.."
رجع تفكيرها يرجع لــ سامر..
"سامر.. الولد الوحيد في العيله إلي يعاني الوحده.. والعجيب إني أشوفه قوي وما عليه من أحد..
يااللـه سبحان الله كيف ماده بالقوه وهو وحيد..أمه ماتت وهي تولده الله يرحمها.. وأبوه مات وهو عمره خمس سنين..ياالله.. عاش حياته كلها يتيم الابوين.. آآه مع أنه سبحان الهس مو واضح عليه إنه متألم لهذا الشي.. همم بعدين أخذه بابا وعيشه معانا.. كان عايش معانا بس هوا في الدور الأرضي وأنا فوق مع بابا ولا عمري في حياتي فهمته ولا حتى جلست معاه!.. كان يطلع بره وما يرجع إلا الليل كثير بابا يهاوشه بس ما يسمع الكلام..إلين وصل الـ 14 سنه طلب من بابا يعيش برا .. وعلى بال ما وافق بابا سكنه في شقه قريبه من بيتنا وبعدها ما عاد صرت أشوفو بالمرره إلا قليل .. بعد سنه طلب يسافر بابا رفض.. رفض قاطع..
(مشيت وعد برا الغرفه وأخذتلها كاس مويه من المطبخ وراحت عالكنب في الصاله تجلس وتابعت تفكيرها بعد تنهيده طويله..)
وما كان يدري إلي يفكر فيه ولد أخوه ولا هوا حتى فاهمه..!!
حاول معاه ما في فايده ,,, وبعدها نسي الموضوع وما عاد فتحه.. مرت الايام وسامر كل ماله ويبعد اكثر ومحد يشوفه من الناس.. كان يقابل ابويا من فترة لفتره.. وبعدها مره ماله حس.. ولحد ما وصل عمره 18او 19تقريبا بعدها قرر يسافر.. للبعثة وبابا هنا وافق.. و سافر ..وبعدها سنه.. سنتين.. كل مالها ورسايله تخف إلين ما أنعدمت تماما.. من اربع سنين.. ومحد يدري عنه شي بس انا حاااسه إنه كان يراسل بابا وما انقطع عنه... والدليل إنو بابا يعرف رقم جواله..
بس..
ألحين هل من المعقول .. حأشوفه.. يا ربي ..المشكله إني أحس كرامتي حتنمحي إذا أستنجدته في مشكلتي..
يااللــه .. مالي غيره بعدك.. ساعدني .. ساعدني يا ربي..
(مسكت الرقم وتأملت فيه).. هذا رقم سامر.. سامر العنيد..سامر الغريب.. سامر الشراني..
هل يمكن إنه يكون تغير .. ما أعتقد.. بس ليه ما يتغير وقيدها مرت عليه هاذي السنين كلها؟؟.. يا ترى إش يسوي في الغربه .. هل تزوج؟؟ يؤ وإش إلي يخليه يتزوج من بره.. لا لا أصلا سامر ما أتوقعه في يوم من الأيام حيتزوج.. هوا أصلا يكره البنات .. كيف بالله حيعيش مع وحده بنت.. ممممم وربي مدري خلاااااااااص يكفي تفكير.. إيش إلي يخليني أفكر فيه هالقد؟؟؟

(أنسدحت على الكنب.. وهي تغمض عيونها تبا ترتاااح)...آآآآآآه وين أنا ...ووين الراحه.. وأنا في هاذي المصيبه..؟!
(رجعت تطالع على الرقم).. يا ترى كيف حتكون ردة فعلك..؟؟ .. وكيف حتتصرف معايا؟؟.. والأهم من هذا.. هل حتساعدني ولا لاء ....؟؟.. !
يلا يا وعد قوي نفسك وأتصلي... مالك غيره يساعدك.."
مسكت الجوال بإرتعاش وتردد وبدأت تدق الأرقام بأصابع مرتجفه.. وقلبها كل ماله ويزيد نبضه إلين ما خلصت من دق الأرقام.. جات بدق على زر الإتصال ........ بــــــــس..!!
رجعت قفلت "لاء....أأأوووه... إشبي ؟؟"
"ياللا ياللا.. أدق مره ثانيه" .. دقت الرقم بسرعه هاذي المره.. وبعدها دقت زر الإتصال قبل لا تتراجع..
. . . . . . .
الرنين يزداد.. وهي ترتجف .. وترتجف.. وترتجف.. قلبها بغا يطلع من بين ضلوعها من كثر ما دقاته عاليه وقويه.. والإضطراب يبا يقلبها قلب من قوته..
... : الو..
أرتعشت شفايفها مهي قادره ترد ..: .....
... : اوووف.. ميــــن؟؟
حست إن لسانها إتقطع .. ما تدري.. مهي قادره ترد..:.....
... : ماشالله، بــس متصل تسمــع صوتي..!
وبعد عبارته هاذي صك السماعه على وجهها..
وهي قعدت تبكي .. "وربي مو بيدي .. يااللــه والله حاولت أرد ...بـــــس... ما قدرت..؟؟
مدري وربي ليه .. مدري؟.."
جلست ودموعها تنزل على خدودها تفتكر صوته.. "يااللـه نفس النبره.. بس تغير كثير.. صار أقوى وأعمق و..... يوووه إشبي .. إيش هذا التفكير الوطي..!
يالله.. يا وعد أتصلي وأتكلمي عدل.. وبلاش غباء حقك.. بـــس لحظه.. رد وأتكلم بلهجتنا.. يعني لو كان هنا في نيويورك كان تكلم بالإنجليزي..؟ غريبه!!
خلاص .. إخلصي يا وعد.. ودقي مره ثانيه وأتكلمي كويـس.. وبلاش تفكير غبي واهبل!! ((خخخ طايحه البنت سب في نفسها وربي مو منها من إلي سار لها ..))
بس ألحين ما قدر.. خليني أريح أعصابي وشويه أتصل.."
.
.
كملت اليوم والحزن كل ماله وينتشل من وردية ملامحها.. وينتعل له قطعه من جسمها..
ما عاد صارت وعد المرحه الضحوكه.. خلاص وعد إنتهت.. وإنكتب موتها بموت أبوها..
مر اليوم وما عادت الإتصال.. واليوم إلي بعده وبعده..
وبعدها وقفت بقوه ورفعت راسها ... "اليـــــــــــوم..
ماعاد فيه تأجيل.. ياللا.."
ودقت الرقم بهدوء.. وبعدها دقت زر الإتصال.. بأقوى من الهدوء الي راح..

. . . حــــانــــــت المـــــواجــــهـــة. . .

جاها صوته هاديء وبـارد..: الوو..
وبهدوء وثقه كبيره ردت: السلام عليكم..
عاود صوته ببرودة أكثر من الثلج..: وعليكم السلام..
من طريقة رده وهدوءه البارد رجعلها التوتر: سامر؟
جاوب بإقتضاب: إيوه..؟
حست وكأنه يبغاها تخلص عليه وتقول إلي تبغى تقوله..... وبســـــــــرعه.. وهذا إلي خلا ثقتها وهدوءها يتلاشى..
وعد: أنــــ ـا .. وعد... وعد بنت عمك فهد
سامر: ....( كان رده السكوت هاذي المره.. وكأن الصدمه شلت لسانه )..
وعد ودموعها تنزل: أعتقد فاكرنا ولا...
قاطعها صوتو المتضايق: مو أنا إلي أنسى أهلي..!
أتفاجأت منو وما عرفت ترد.. وما عرفت إيش سر الضيق في صوتو.. "يا ربي هل عشاني أتصلت.. أو إيش,, أووف فأجأني برده.. وبعدين تصرفاته تقول غير! كيف إنه ما نسي أهله.... مني عارفه كيــف أكلمه.. يوووه نفسي أصك السماعه .. بس بعد إيش..!!"
سامر قطع أفكارها بصوتو إلي رجعله الهدوء:.. حصل شي؟
هنا وعــد ما قدرت تستحمل شهقت وبكيت بقوه.. "ياالله يا سامر تسأل .. تسأل إيش حصل ..آآه إيش أقولك وإش أبقي..؟"
قابلها سامر بالسكوت لمدة دقيقتين وبعدها رد وبصوتو نغمه ما فهمتها: حصل شي لعمي؟؟
قالت وعد لنفسها.. "يؤ كيف تفهمها يا سامر كيف ؟؟ .. نفسي أعرف .. نفســـي.. طول عمرك وأنت تفهم الناس وتعرف إش يقصدو.. وبإيش يلمحو..! ,, إلا إنت.. محد يفهمك..!"
حاولت تتكلم بس ما قدرت إكتفت إنها تقول بهمس: مـــــات!
لمدة ثلاث دقايق سامر ما رد .. وبعدها همس بنبره دهشة .. : عمــي مـــات!!
ما قدرت ترد بولا شي..:.....(ودموعها تنهمر)
سامر: إنتي عند خالك!
وعد بهمس وضعف ما توقعت إنه في يوم من الأيام حيكون في صوتها وخــــاصة قدام... سامر! ..: لاء.. أنا فــ أمريكا
سامر وهاذي المره صوتو منفعل: أمريكــــــا..؟!
وعــــــد مخنوقه: إيوه..
سامر: وإيش وداكِ هناك؟
وعـــد وقدرت تهدئ من نفسها: أنا وبابا من خمس سنين جينا هنا عشان شغله..
سامر: طيب فين فأمريكا؟
وعــد: معاك.. في نيويورك..
سامر: بس أنا ماني في نيويورك.. أنا فـ السعوديه ألحين.. ((كان توه راجع من نيويورك وفي المدينه المنوره عند اهل امه))
خلاص هنا وعـــد بغت تطيح من الصدمه: وأنا.. يعني لوحدي هنا.. مالي أحد..لاء لاء.. (ورجعت تبكي)
سامر بحنية أستغربتها وعــد: خلاص وعـــد لا تخافي .. إن شالله بأقرب طياره أنا جايلك..
ما حست وعد إلا إنها تقول بهمس: لا تتأخر..أنا خايفه..
سامر قال بإقتضاب: لا تقلقي.. مع السلامه
وعــد: ...... مع السلامه..
صكت وعد الجوال وهي مهي مصدقه.. "الحمــــــــدلله..
أخيـــــــــــــــــرا .. الفرج قرب..
بس المشكله ... ســـامـــر.. ما أبغى أتصرف معاه.. ما أبغاه هو بالذات يساعدني..!
هه.. وربي إلي يشوفني ما يصدق كبريائي هاذا.. بعد ما شاف ضعفي معاه وأنا أكلمه..
بس مدري إش صارلي .. ما حسيت بنفسي إلا ضعيفه قدامه.."
.
.
أبكي ضعف حيلتي.. وأنا لك محتاج..
جبرتني دنيتي.. أرخي لك الراس..
وجهرت للعالم إن وعد والضعف واحد..
.
.

[ جــده.. 8.02 صباحاً ]
.
... :حسام!
حسام: هلا أمي..
أم حسام: جبتلك كاست حليب.. تشربها قبل لا تروح شغلك..
حسام: أبشري يا عيوني..
وقفت أم حسام تتأمل في ولدها..
حسام غمز بعينه: تبي تقولي شي.. صح؟؟
أبتسمت أمه وقالت: خلاص خطبتها لك..
سكت شوي وبعدين قال: سراب!
أم حسام: إيوا يا حبيبي .. مو هيا إلي كلمتك عنها قبل إسبوع..!
حسام: اها..
أم حسام بخوف: كأنك منت فرحان؟.. يا حبيبي إذا ما تبغاهـا ...
حسام: لا ما عليكي يا أمي.. بس تعرفين الزواج مسؤوليه وهذا إلي شاغل بالي..
أبتسمت أم حسام بحنية لولدها إلي طول عمره عقله يوزن بلد..: يا قلبي.. أنا واثقه فيك..إنت قدها وقدود..
أبتسملها حسام وسلم على راسها..وودعها وهو رايح..: مع السلامه
أم حسام: في حفظ الله يا ولدي.. وإنتبه .. لا تسرع هاه؟
حسام وهو يضحك : أبشري يالغاليه..
قعدت أمه تدعيله.. وهي ماشيه رايحه لغرفتها.. وفطريقها شافت غرفة سمر مولع نورها.. إتفاجأت وراحت لها..
أم حسام: سمر!! ليه ما رحتي المدرسه؟؟
سمر وهي منسدحه تتثاوب: ماما .. ما فيني.. أبغى أنااااااااام
أم حسام: يوووو اووه.. إلـ متى وإنتي مهمله.. هاه؟ .. عاد إنتي ألحين ثالث ثانوي.. ما يسيـــــر؟!
سمر وهي تدلع: ماما ..ماما ... الله يسعدك.. كذا تضغطون عليا.. وبعدين إثر الضغط... (وهي تستهبل).. تحدث إنهيارات شاسعه.. في عقلي.. وبعدها سيعجز تفكيري عن السيطرة على ما يحفظه من المواد.. فــ....
أم حسام وهي تضحك: اللــــــه.. اللـــــه .. اللـــــــه.. إيوا عاد تتفلسفي علينا عشان نتركي.. (هنا رمت عليها مخده) خلاص طيب يلا أنخمدي.. هاذي مشيتها عليكي بمزاجي.. بس وربي لو غبتي تاني يا ويلك..!
سمر وهيا تتغطى: ماما أنا دلوعتك..
أم حسام: لا يا عيوني.. الدلع عندي بحدود.. مو يعني أخليكي تضيعي مستقبلك..ياللا نامي.. علشان تقومي بدري وتسوي الغدا.. بدالي .. طيــب ؟
سمر: طيــــــــــــــــــ يـب..
((::توضيح:: سمر عمرها 18 سنه .. اوصف لكم شكلها.. كانت ناعمه بشكل كبيــــــر وجمالها جمال نــــــاعم وهوا إلي يميز عايلتها كلهم كانت ناعمة بشكل جذاااااب وحلو.. ولونها مايل للسمار شوي.. وشعرها كان بني غامق.. نازل عن كتوفها شوي.. وعيونها عسلي غامق.. وجسمها حلوو ومليانه شوي وهي ما كانت لا بالطويله ولا القصيرة..))

اول ما راحت امها فتحت المخده بسرعه وردت على جوالها إلي كان مفتوح لأنها دسته وسوت نفسها نايمه اول ما جات امها..
سمر: هههههههههههههههههههه
مروه: مخبووووووله وربي ههههههههههههه
سمر: طب إيش تبيني اسوي لازم اكحلها شوي علشان ما آخذ دبل هواش..
مروه: بس تستاهلين الهوااش
سمر: تتشمتين هااه.. ياااااارب امك تجيكي تهااااوشكي ألحين ياااااااااارب وابوكي كمااان يااارب
مروه: بــــــــــــس بــــــــــــس الله لا يوفق شيطانك إلي مقاسه اكس اكس لااارج
سمر: لا ماااا اسمحلك تتكلمي عن شيطاااني خخخ استغفر الله
مروه: الحمدلله والشكر البنت انهبلت.. ياللا لا اتجنن برووح ارجع انااام..
سمر: ههههه ياللا طيب احلااام سعيده
مروه: اميـــــــن تصدقي إتفاقنا حلووو بالغياب مع بعض
سمر: اكيد طبعااا إنتي فاشله وتبيني اسير زيك فاشله
مروه: إيـــــــــش يالـــــ... طيب طيب هذا جزائي علشاني بخليك تتونسي معاايا.. طيـــــــ يب!
سمر: هههههههههه امــــــــــــزح معاااااااااكي يا بت.. ياللا حقك علي.. خخخخ
مروه: إيوا هذا إنتي دايما تقوولين الغلط وبعدهااا تعطريه بكلامك
سمر: يوؤ زعلتــــــــــــي!!
مروه: هههههههههههه لا لا .. خخخ اسوي نفسي بعرف غلاتي بس بااان على طووول صوتك القلقااان خخخخ
سمر: طيـــــــــــب تلعبي علي انا اوريكي..
مروه: هههههههههه بس عااد ياللا بناااااام.. تصبحي على خيـــــــــــــــر يا عمري
سمر: وإنتي من اهل الخير والسعـــــــاده يا قلبي
.
.
.

[ نيويورك.. 9.46 صباحاً ]
.
لوحدي.. أغزل صوف عذابي..
وأستنشق رحيق الألم لرئتاي..
وألّم ما تبقى مني في حضني..
هُنا.. يوم سعادتي..وهُنا.. يوم تعاستي..
فهل يا ترى سيكون "هُنا" يوم رحيلي..؟
.
.
خرجت وعــد من الحمام بعد ما أخذتلها دش.. وهي واقفه قدام التسريحه تنشف شعرها وتتأمل شكلها.. كان شعرها فاحم السواد طويل لآخر ظهرها ومموج بطريقه حلوه ناعمة.. ملامحها كانت خليجية وبالاخصية سعودية.. عيونها وساع مرسومه رسم من ربي وإلي يشوفها يقول مكحله والبؤبؤ اسود رموشها طويله وكثيفه.. سبحان الله الحواجب مرسومه عـ العين.. فمها صغير وشفايفها ممتلئة شويـــة بس و وردية.. وبشرتها صافيه وبياضها بياض أهل الجنوب.. حلو.. كانت طالعه لأبوها في كل شي إلا البياض أخذتو من أمها.. جسمها كان نحيف بس رويان ومتناسق يعني ماشاءالله حلو مره وهي كانت طويلة طول حلو..

جوالها يدق..
"اوه .. هذا رقم سامر.."
أخذت نفس عميق .. ووقفت وقفة عسكري..: هلا..
سامر بصوته الهاديء زي المكالمه السابقه: السلام عليكم..
وعــد بهدوء: وعليكم السلام..
سامر: وصلت نيويورك.. بس قوليلي وين ساكنه؟؟
قعدت وعــد توصفله بهدوء إلين ما خلصت وبعدها علمته على رقم الشقه وصكت عنه..
"يا ربي .. ألحين سامر حيجي هنا.. يؤ .. خايفه.. خايفــــه منو.. يا ربــــي وهو مو وحش علشان أخاف منو بهذا الشكل.. بس مدري هوا سامر نفسه إلي مخلي نفسه يخوف.. بتصــــــرفـــاتـــــه!"
راحت ولبست طرحه تغطي بها شعرها.. وتنوره سوده مع بلوزه خضره.. ما كان لها مزاج تنقي إي لبس.. لبست إلي شافته قدامها على طول.. ما كانت تتعب كثير في لبسها وهذا راجع لجسمها المتناسق والحلو.. بعدها راحت جلست في الصاله.. تفكـــــــــــــــر..
"يا ترى.. كيف حيكون شكلك يا سامر..؟؟ أتغيرت ولا لاء ..؟؟ ممممم ....!" ((لازم شغلت البنات هاذي خخخ حتى وهم في احلك الظروف ههه..))

تنهدت ورخت راسها على ورا.. وهي تحس إن الدنيا خانقتها.. خنقة بعثرتها.. وشتتت نفسها.. والأهم ضيعتهــــــا!.. "آآآآآه .. بحاول ألّم نفسي قبل لا يجي.. ما أبغاه يوصل وأنا بهاذي الحاله.. بــــس ما قدر..!"

سمعت دق على الباب. . . . . . . !
أرتجفت بقوه .. لدرجة حست نفسها مهي قادره تقوم.. حاولت تسيطر على كيانها .. بس عجزت..
والدق يستمر. . . . . . !
"خلااااااااااص .. خلاص يا وعـــــــــد ياللا.. "
أخيـــــــــــرا قدرت تقوم.. راحت للباب وهي تحس إن ورا الباب شي. . . . . مجهــــــــــول..!
وقفت عند الباب .. وبعد ما أخذت نفس كبير وعميــــــــــق.. فتحت الباب بشويــــش.. ومن دون ما تسأل مين ..؟ ولا تطالع وتعرف مين..؟ كانت متأكد إنه سامر..
... : يعني تفكي الباب كذا.. ولا تسألي مين؟؟.. أفرضي يكون حرامي..
أرتعشت خاصة لما قال الكلمتين الأخيرة بعصبية.. لفت راسها الجهة الثانيه وهي ساكته.. حتى ما طالعت عليه وهو يدخل .. "يؤ إش فيه هذا حتى ما سلم ولا سأل عني .. يعني خلاص علشاني وحيده ينفك علي زي كذا.."
دخــــل بهدوء.. وطالع فيها شوي .. وبعدين لف على الشقه وصار يتأملها.. أما هي فرفعت نظرها بشويش وشافته.. أتفاجأت ملامحه ما تغيرت .. إلا زادت رجوله وقوه.. .. وجاذبيــه.. وشعره اسود كثيف ناعم بس مو منسدل.. جسمه رياضي طويـــــل و.. ((::توضيح:: حتى سامر يشبه أبوه مرررره.. نسخه منو .. ولهذا السبب سامر ووعد متشابهين تماما.. إلي يشوفهم يقول اخوان بس طبعا وعد بيضه زي أمها.. يعني هذا الاختلاف بينهم.. يعني هذا إن سامر لونه حنطي يعني اسمر شوي سمــار حلو.. وجذاب.. ونظراته تذبح.. وعمره ألحين 25سنه ..))
أستحت منه كثير بشكل ما قيد أستحته من أحد ثاني .. غيـــره..!.. حاولت تكون قويه..
وعــد: أتفضل إجلس يا سامر
دخل بهدوء وجلس.. ورجع يطالع فيها نظره بــــارده وحاده بنفس الوقت.. كانت هذي نظرته إلي مشهور فيها من يوم كان صغير وكأنه بنظرته هاذي يوجه إتهام للي قدامه.. مع أنه أعتاد يطالع كذا.. فهذي هي نظرته المميزه!.. حيرت وعـــد وطول عمرها تحتار قدام نظرته هذي.. بس تماسكت.. وقالت وهي رافعه راسها بزيادة..
وعــد: تبا عصير..
سامر بسخريه: على إيش رفعة الراس هاذي..(وطالع فيها نظره من فوق لتحت نرفزتها)
هنا وعــد عرفت خلاص إن سامر ما تغير.. سامر هوا هوا نفسه .. الخبيـــــــث.. الشرانــــــــي.. !.. وانقهرت من موقفها.. ياالله وربي مجبوره .. مجبوره أستنجد فيك.. مجبـــــــــــــــــــــــــوره!
طالعت عليه بنظره حاده .. ولفت للمطبخ تجيب عصير.. إلا سمعت صوته..
سامر بإشمئزاز: هااااي إنتي.. ما ابغا منك شي.. بس تعالي نتفاهم ..
وعــد رجعتله وهي معصبه: نتفاهم على إيش..؟؟
سامر وهو يرفع حواجبه بتريقه: إيش بك؟؟.. حاجه مست عقلك..! نتفاهم على رحلتك للسعوديه..
أنكسفت وعــــد بشكل وانقهرت منه بنفس الوقت.. "آآآخ يا غبائي .. إيش بي.. وربي سرت مضحكه ولميـــــــــن لسامر"..بس قالت بكبرياء: اها .. ما كنت منتبهة.. (وبعصبيه) وبعدين إنت لو سمحت اتكلم معايا عدل!
سامر بإشمئزاز: إيش إيش إيش.. اقوووول إنتي ابلع إلسانك لأبلعك هوا ألحين
وعد بقهر: ساامر كفااايه إلي أنا فيــــــه.. خلاااااص
سامر ببرود: إنتي إلي جبتيها لنفسك
وعد: اووووه خلاااص قولي ألحين على الرحله........(وبغيض) لو سمحت
سامر سكت شوي وببرود يقهر قال: إجلسي أول!!
أتفاجأت وعد في البدايه إلا على طول فهمت وجلست بشويش.. مرخيه راسها .. ولما شافته ساكت.. راحت رفعت راسها بإعتزاز..
وعــد: ياللا إتكلم..
سامر بهدوء: الرحله حتكون بكره عالفجر.. وحأنزل معاكي علشان الرحله حتكون طويله.. من نيويورك للندن ومن لندن لجده.. لأني مالقيت حجز فطياره إلي تروح لجده مباشره..
قاطعته وعــد بثقه: طيب.. ما يحتاج تجي معاي.. أنا أعرف أتصرف لوحدي..
سامر بإبتسامة أستفزتها: سوري.. حأجي معاكي.. يعني حأجي..
وعـــد رفعت صوتها: قولتلك أعرف أتصرف لوحدي..!
سامر بصوت واطي وهادي: وليه العصبيه هاذي كلها؟؟
سكتت وعــد وما عرفت ترد...:....
سامر بنبرة .. يبغى يوصلها من خلالها إنه ما في نقاش بعد كلمته: جيّتي معاكي أمر منتهي منو.. (أخذ نفس.. ونظره سارحه شوي للبعيد وبعدها رجع يسأل وعــد).. كلمتي خالك؟؟
وعــد رفعت راسها له.. وبعدها هزت راسها بمعنى نفي.. وقالت: ما قدرت
كانت الدموع تبا تنزل من جديد على خدودها .. بس وعد كتمتها في عيونها وحاولت قد ما تقدر تمنع نزولها.. ما تبغى تبان ضعيفه قدام أحد.. وخــــــاصة .. سامـــــر..
فكر سامر شوي وبعدها قال: كويــس.. ما كنت أتمنى تقوليلهم إلا هناك.. يكون أحسن.. إلا يا وعـد .. كيف مات عمي؟؟
وعـد بغت تبكي للمره المليون بس كتمت إلي في نفسها وقالت بأكبر هدوء قدرت تصطنعه: بابا كان طيب..وبصحه.. بس فجأة سار دايما يجي من الشغل مزعوج وتعبان .. ولما أسأله يقولي شوية مشاكل بالشغل.. وفجأة طاح مريض ومدري بين يوم وليلة.. مـ ـات..!
حست نفسها ضعيفة تحتاج من يلمها بالحنان .. تحتاج من يشملها بالعطف.. والاهتمام بس ما في أحد .. إلا سامر .. ومستحيل يكون في هذا المقام..
اما سامر فحس إنو وعد ضعيفه غير عن ايام اول.. قبل ما يسافر.. كانت اقوى بكثير.. بس عذرها بموت ابوها.. صحيح ما كان بقيلها في حياتها إلا هوا.. واهوه مات..!
كان الصمت يخيم عليهم.. تقريبا مرت خمس دقايق وبعدها قطعها سامر وهوا يوقف..
سامر ومو واضح على وجهه أي من افكاره الداخليه..وقال ببرود ولا كأن قدامه وحده تعاني: شوفي .. بكره الفجر أمرك .. وعـ المطار على طول..
وراح للباب وخرج ..
.
.
أعاني حاجتي لأغلى أنسان..
تفتخر به أي فتاة عربية..
فقدته .. من بعد أن علمني حبه..
والآن.. فقدته.. للأبد..
أبي..
سأنتظر يوما ما يأخذني إليك..
.
.
"هه .. جا سامر وكملها علي.. ما كفاني موت أبويا .. جا هذا ببروده اصلا البرود بحد ذاته يقهر ويرفع الضغط أجل كيف لو جا معاه الغرور والثقه الزايده... هههه (ضحكت بقهر وعيونها تضوي نار.. وبعدها طيحت التحفه إلي عـ الطاوله قدامها) أكرهك يا سامر.. ونا تمنيت إنك تتغير وتغير نظرت الجميع عنك من وانت صغير.. بس المصيبه ما تغيرت.. ابدا.. ومعاه ما راح تتغير مشاعري لك.. أنا أكرهك أكرهك..!"
تكت على يدينها وهي تطالع للاشيء.. حست بأن الحياة تافهة.. وهيا أتفه.. كرهت كل شي.. من بعد أبوها.. اصبحت الحياة ســــــراب.. وما عليها إلا تنتظر متى يرحل هذا السراب.. لأجل تختفي الحياة.. وبعدها ممكن تجتمع مع أبوها..

، ،

إيش حقيقة مشاعر سامر وإيش مضمون غموضه وحل لغزه؟؟
وهل حتتغير معاملته لوعد؟؟ وحيحن عليها ولا حيزيد الضغط عليها؟؟
ووعد البنت إلي كابته كل شي بداخلها هل حينفجر ولا حيضل مكبوت بداخل اسوار قلبها؟؟
ولما ترجع لأهلها هل حيلموها ويعوضوها عن حرمانها.. ولا حيسير شي آخر؟؟
قلوب متحجرة وألسن متسلطه.. تابعووها معي..

..::[]::[]::[]::[]::[]::[]::[]::..

تابــــــــــــــــــــع

~)(~ الفصل الثاني ~)(~
[]**[]..إن كان للضعف وجود.. فمحال لداخلي يتمد ..[]**[]

[ جده .. 1.55 ظهرا ]
.
... : ها سموره أكيد ألحين مخلصه من الغدا ولا ؟؟
سمر: ممممم مـــــــامــــــــــا .. لا تدخلي المطبخ .. اش اتفقنا إحنا.. !
أم حسام: اوه اوه طيــــب خلاص أهوه خرجت..
أبتسمت سمر وهيا تشوف أمها وبعدين طلبت من الشغالة تجهز السفرة على الطاوله.. وتساعدها في حطت الاكل..
وبعدين نادت امها عالطاوله.. انتظرو حسام 5 دقايق ويوصل.. كانت الهنوف إلي ما تعدت الخمس سنوات واشرف ذي الثمان سنوات يتسابقو مين يوصل للطاوله قبل ..
اشرف: وخيييييييي عليكي انا وصلت قبلك..
الهنوف: هاه هاه هاه (تلهث من الجري) لأنك سريــــــــــــــــــع..
اشرف: قولي ما شالله..؟
الهنوف : (تطلع لسانها) مابا..
اشرف : (مسك يدها بقوه) قوووووووووولي لا تعانديني..
الهنوف وهي تبغا تبكي: ما با يعني ما بـ ـــا..
... : هااااااااااااي إنتو خلاص ما تسكتو..
رفعت سمر نظرها: سميـــــــر..! متى جيت من المدرسه؟
سمير إلي كان عمره 17تقريبا : مالك شغل..
سمر وهي معصبه: ألحين قولت غلط..؟ سألت سؤال والطبيعي يجاوبه كويس..
سمير يطالعلها بنظره هزليه ويرفع حواجبه وينزلها يبا يستفزها..: إنتي أبويا وأنا مدري!!
سمر: أمـــــــــــــــي إذا ما ربيتي هذا الغبي .. وربي حأ...
سمير يقاطعها: يعني إيش قصدك يعني أنا ما تربيت؟؟
سمر: أصلا إنتا ما تنفع فيك تربية.. إنتا يبغالك مصحة..
سمير يقرب منها : إيش إيش إيش..... إلي على راسو بطحه... (ويطالع في الهنوف) ايش يا لهنوف؟؟
الهنوف مبتسمه.. (مهي داريه عن الطبخه) وتكمل: يحسحس عليها..
ضحك أشرف وهو يسويلها حركات تقهر..: خخخخخخخخخخ
سمر تتأفف: اوووووو اوووووووووف.. ( على دخلت حسام )
حسام: اش اش ...!! خير إن شالله ليه السيده سمر تتأفف..
سمر عارفه إن حسام حيستلمها مع البقية.. فقامت.. ونادت أمها.. للغدا..
جات أم حسام: يا هلا بحسام .. هلا حبيبي تعال للغدا.. وياللا يا حبايبي .. سمو بالله وكلو..
سمر سكت اسنانها بقووه: ايوا ايوا ايوا.. حبيبها جااا خلاااص كان ما افتكرتينا كمان..
ام حسام وهي تغرف لحسام: والله يا حبيبتي اخوكي جاي من شغله تعبان ومهلوك.. يحتاج عنايه..
سمير وهو ياخذ القلم من جيب حسام: عنايه مو دلع..!!
حسام ابتسم له وسكت..
اشرف: ياخذ قلمك وتبتسم له..
حسام: فداه..
الهنوف: حتى انا ابا!
حسام: اجيبلك ان شالله
الهنوف: هااااااااإي
اشرف يطالع فيها بقرف: يا فرحتك هاذا إلي يفرحك اووف!!!
سمير وهو يطالع فـ القلم: وربي رهيـــــــــــب.. مشكوووور حسوووم
سمر وهي تاخذ من السلطه: يا عيني يا عيني.. ترا يا حسام احذرك سمير مصلحجي مررره..
حسام وهو يدي قرموع خفيف لسمير: هههههههه اعرفه اناا.. تسأليني عنو..!!
وبعدين طالع فـ امه بتساؤول: فين ابويا ..؟ ما راح يجي..؟؟
أم حسام: ايوا .. عندو اجتماع.
سمير: كالعاده..
طنشت أم حسام.. وأكتفى حسام بنظرة حادة لسمير سكت بعدها ماد بوزو..
بعد خمس دقايق من الصمت والكل مشغول فأكله..
حسام: اووه الملح كثيــــــــــر..
سمير إلي كان عارف إنو سمر سوت الغدا: ههههههههههههههههههاااااي علشان الفهيمه سمر سوته..
سمر مدت بوزها: امـــــــــــــــــــــــــي شوفيـــــــهم يتريقوو علي..
ام حسام وهي تقطع للهنوف: خلااااص يا عيااال لا تتريقو وتتمصخرو على وخيتكم.. وربي إنها زبطته احسن من الشغاله..
حسام: هههههههههه احسن منها هاااه.. ههه هي الشغاله تسوي شي اصلا..
سمير: كككككككككككككك خخخخخخ سمر وربي انتحر مره ثانيه تسوين الغداا تراني ميت من الجوع.. ألحين بروح اتغدى في مطعم..
طالعه حسام ورفع حاجبه: ها ها ها.. وليه خلصت صحنك..!!!
سمر: خخخخخخخخخخخ وتقوول ما عجبك..
سمير وقع: إيش إيش.. لا لا اصلا كنت مره جيعاان..
حسام: خخخخ اعترف إنه عجبك ياااا خي.. عـ العموووم.. سموره.. تسلم يدينك حبيبتي الغدااا حلوووووو.. وربي
سمر ابتسمت: ربي لا يحرمني منك ياااخوويا.. إيوا كذا الناس تعجبني.. إلي يحمسووني اسوي مره ثانيه
ام حسام: خلااص طيب نبغاكي دايما تسوين الغدااا
حسام لما شاف اخته انفجعت: ههههههههههههههااااي وقعت البنت..

قعدو يضحكووون ويفرفشوون.. شوي.. وبعدهاا..

أم حسام: سمر بعد الغدا بكلمك لا تنامي..
سمير: (يوجه كلامه لسمر) ها ها .. شكلك مسويه مصيبه..
سمر: اقول إنتا ليه حاشر نفسك في كل شي..
أشرف: هذا مخفه اخصوريكي منو..
سمير بنظره تقدح شرر: إيـــــــــــــــش!!
أشرف بخوف: لا لا سلامتك..
سمير: أحسب..!!
حسام وهو يقوم: الحمدلله.. أنا رايح أنام الحين..
أم حسام: تصبح على خير يا بويا..
حسام: وإنتي من أهلو..
.
أتسدح حسام عـ السرير علشان يرتاح بعد شغلو المتواصل هوا ألحين توو داخل الـ 23 سنه.. طويل وجسمه كان مليان شوي بس ألحين سار نحيف.. لأنو من النوع إلي إذا أنكرف ينحف بســــــرعه ما يتحمل جسمه.. بس برضو جاي عليه حلو النحف.. ومواصفاته زي أخته سمر إلا أن ملامحه رجوليه وعاديه بس حلوه.. كان يلبس نظاره صغيره بإطار من الجنب عريض عودي مره جايه عليه روعه مديته جاذبيه.. وهوا خاطب سراب بنت خالته نوره..
.
"آآه أيام وتكون لي غيرك يا وعد ونا طول عمري ومتأكد إنك إنتي وبس إلي ليا.. بس الزمن يفرق (صك عيونو وهو متضايق) للأسف يا وعد أمي ما ترضى أتزوج وحده عاشت فأمريكا خمس سنين مدري إيش سوت وإيش ما خلت.. وأصلا مدري ليه ابويا وامي يكرهوكي إنتي وابوكي.. يعني المسألة مو بس علي على العايله كلها.. أصلا لو كان علي كان ما همني أحد أخذك رغم كل شي.. لأني أثق فيكي أكثر من ثقتي بنفسي.. "
جنحت فيه الذكريات لورا..

. . . . . . . . . . . . . . . . . . !

كان وقتها حسام عمره في الـ 14 و وعد عشر سنين..
حسام: وعــد ..
وعد مبتسمة: نعم..
حسام: أبغاكي توعديني وعد يا وعد (وتوو أنتبه) هههههه..
وعد تضحك: هههههه طيب.. إيش أوعدك؟؟
حسام بتردد وخجل:مممم
وعد: ياللا قووول!
حسام: طيب بقول..
وعد مبتسمة تنتظر: ..؟
حسام: إننا لما نكبر ما تتزوجي غيري..؟؟
وعد شهقت وضحكت وهي مستحيه: هههه (وشردت ورا مرت خالها أم حسام
أم حسام: إيش فيــــــــه؟؟
حسام منقهر: اوووف ياهبله.. انقلعي..
وعد تصك أذانيها: لا عاد تكلمني (وتضحك بشويش)

. . . . . . . . . . . . . . . . . . !

تذكر ذاك اليوم .. وأنها رفضت توعدو.. عرف ألحين السبب.. "آآه لأنه لي غيرك يا وعد!!"

.
.
.

... : هنا تعالي..
... : ماما خوفتيني إيش فيه؟؟
أم حسام: لا تخافي يا سمر ما سار إلا الخير..
سمر: مممم طيب ياللا قولي..
أم حسام: وربي مدري إيش أقولك لأني عارفه راسك اليابس..
سمر: ماماااا إيش فيـــــــــــــــــــــه؟؟؟
أم حسام: مهند رجع خطبك..!
سمر بنرفزة: اوهووو علينا قولت ما ابغاه إيش هوا بالقوه..
أم حسام: أنا بس بأعرف إيش فيه شي مو عاجبك.. حليوه وطيوب وحنون ومرح و...
سمر تقاطع: هوا ذااا ... مرح بزيااااده ومو حق مسؤوليات.. لا وكمان هوا قصـــير!!
أم حسام: يا حبيبتي مهو اقصر منك..!
سمر: تراه اطول مني بس بـ 2 سم!!!
ام حسام: يا بنــــــت .. لا تقولي هذولي السببين إلي مكرهينك فيه.. ؟؟
سمر: يا ماما يا حبيبتي .. هذا زواج ومني أخذه إلا إلي يركب راسي..
أم حسام: ومين هذا إلي يركب راسك إن شالله؟؟
سمر: ليسع ما جا!!
أم حسام إلي تتريق: لا يكون تعرفيه من هنا ولا هنا؟؟ (واثقه من بنتها بس تمزح معاها)
سمر مبتسمة: مامي إنتي تعرفيني وتعرفي قصدي.. يعني أنتظر إلي يجي ويدخل مزاجي على طووول..
أم حسام: عارفه عارفه.. بس إذا ما جا أحد يركب مزاجك؟؟
سمر: لا.. أعوذ بالله.. ماما لا تتشائمي..
أبتسمت أم حسام: اوكي حبيبتي بس الله يخليكي فكري بمهند شوي واستخيري..
سمر: مــــامـــــا بليــــــــــز قولت ما اباه يعني ما اباااااهـ .. الله يسعدك لا تفتحي السيره مره ثانيه.. والاستخاره إلي أعرفه ما تجي إلا بعد الاختيار.. وأنا ما أخترته ولا حأختاره بيــــــوم!
أم حسام : (وهي تقوم طالعه لبره) إنــــــا لله وإنا إليه راجعون.. ياااااارب تعقل هالبنت يااارب.. ( ورجعت تلتفت لها رافعه حواجبها) إلا تعالي كيف عرفتي إنو اطول منك بـ 2 سم..؟؟
سمر وهي تضحك: ههههههه إلي يسأل ما يتوهش!
أم حسام: شكلك فصفصتي الرجال فصفصه!!.. (ورجعت تطلع) والله إنكم بنات آخر زمن!!
.
.
.

[ مطار نيويورك.. 7.22 صباحاً ]
.
... : هيّا.. جا موعد الطياره
وعد: اوكي سامر .. أنا جاهزه
سامر: ياللا
.
بعد ما جلسو بالمقاعد المحجوزه لهم وما قدر سامر إلا يجلس في المقعد المجاور لها لانه ما لقى في مكان ثاني خاصة إنو يمكن يجلس جنب وعد رجال اجنبي..
كانت وعد عالنافذة وسامر جنبها..
وطبعا وعد كانت خجلااانه بالمووت جنبه .. "اوووف اشبو جسمي حااار ياالله ااخ .. بس إن شالله ما ينتبه هههه وربي إني خبـــــــلة مممم ".. حاولت تنشغل وتقرا المجلات إلي قدامها كانت كلها بالإنجليزية ووعد تعرف الأنجليزي كويس وهذا راجع لحياتها فأمريكا..
قعدت تقرا وتقرا .. إلين ما ملت.. حست بالحنين لوطنها.. " السعوديه وربي ما في مثلك في العالم.. (حست بكل اشواقها تنفجر معلنة الحب والولاء).. آآآه لو بيدي ما سافرت.. بس بابا كان ملزم علشان مشاريعه إلي ناويها.. رحلت منك يا بلدي ونا ما اتوقعت ارجعلك وحيده.. ما توقعت تكون هناك اخر محطة في عمري مع ابويا.. وربي مشتاقه.. مشتاقه للاستقرار.. والامان.."
كانت تفكر وتحاكي الزمن.. وما كان لا حس ولا خبر من ناحية سامر إلي شكلو كان يفكر ومتعمق كمان..
.
"آه يالدنيا هذا أنا راجع لبلدي إلي ما توقعت فيوم أرجعله.. بلدي إلي ما كرهته إلا بسبب أشخاص كانو سبب في تعاستي.. رجعتلها.. ومع مين مع مخلوق غريب خخخ".. ((اوهوو وعد مخلوق غريب ..!! طيب يالوغد وربي لو عرفت حتشوف النجوم في عز الظهر وطبعا أكيد حتكرهك زيادة عاد هي ناقصه كره لك..))
نرجع لتفكير سامــــر..
"راسي مصدع يووه" .. سامر كان يحس نفسه تبعان.. ودايخ.. ومتضااايق.. عمه مات.. وبقي من وراه بنت عم.. وهو لازم يكون ولي لها.. مهما يسير هذي بنت عمه.. وكمان هوا ما يطمن لخالها.. لأنه عارف حقيقته.. وعارف كل شي يدوور من وراهم..
ما يعرف ألحين.. يمكن الشعور الوحيد إلي يقدر يفسرو في نفسه.. هوا شعورو بالضيـــــــاع.. ومشاعر متناقضه.. مشتاق للوطن.. بس ما يبا يرجعلها علشان ناس يكرهم فيها..!
.
عند وعـــد..
رجع لها التفكير.. وعد خايفه من موقفها هناك.. وكيف حيقابلوها.. هل حيرحبو فيها ولا لا ؟؟ بس هيا دفعت هذا كلو عنها .. كانت تستنشق الهوا بهدوء تستمد منو قوة تقوي قلبها.. وعد ما اعتادت عـ الضعف.. ولا تحب تطيح في بؤرة الضعف طول عمرها وتنفر من ذيك الشاكلية .. تحب تكون دايما القوية إلي ما يهمها كلام الناس.. ما يهمها إذا كانت عــ الصح.. وأهم شي الكرامه عندها.. تذكرت شي.. حست إنها بحاجة لأستشارة أحد غير الأهل إلي حتقابلهم هناك.. أهل خالها.. ترددت تسأل سامر ولا لاء .. وفي الأخير حست إنها بحاجة تسأله.. عرفت إنو ما راح تذل نفسها هوا بس سؤال والسلام..
وعد: سامر..
سامر: همم..
وعد: ممكن أسألك سؤال؟؟ يعني إستشاره..
سامر ببرودو المعتاد وبلا إهتمام: إسألي..
أنقهرت وعد منو بس قالت في نفسها.. "مو وقتو التراجع .. حيكون شكلي يضحك بعد ما أتراجع.."
وعد: ما أبغى أسكن مع خالي..
سامر: إيش؟؟.. لا يا شيخه وفين إن شالله حتسكني في الشارع ولا بدار الأيتام..
وعد بعصبيه: لو سمحت سامر لا تتمهزل أنا ما كملت كلامي..
سامر بطريقه مستهتره: كملي يا صاحبة السمو..
تضايقت وعد من طريقة كلامو بس أتجاهلت وكملت بإشمئزاز: بأستئجر شقه وأسكن فيها..
سامر انقهر منها: وليه؟؟
وعد بعصبيه: سامر أكيد إنتا فاهم أعتقد إنك أذكى من سؤالك..
سامر مط شفايفه وفهمها كويس بس حب يستهبل وقال ببرود: اووف بلا هبل إنتي يعني حتقولي إنك ما تبي تكثري عالناس و ما تبي تثقلي عليهم.. بس هذولي أهلك وغصبن عنهم يضموكي لهم.
وعد فهمت إنه يستهبل: بليز سامر أبغاك تحجزلي شقه .. مهما كان ما أبغا اسكن مع أحد.. في النهاية أكيد بيتضايقو.. وبعدين (كانت بتقول شي بس تراجعت) .. إنتا تعرفهم فلا تستهبل عليّا..! .. اتمنى إنك تساعدني..
وقالت في نفسها.. "اوووف ذليت نفسي زياده اااخ يالقهر وربي نفسي افقعك!!".. ((::توضيح:: وعد كانت بتقول إنها ما ترتاح في بيت خالها.. تحس إنهم ما يحبوها.. ولا يفرحهم وجودها.. وهذا الشي كانت تشعربه من قبل لا تسافر مع المرحوم.. المهم إنها في الاخير ما حبت تقولها لسامر.. معنها متأكده إنه حتى سامر الكل ما يحبه.. هناك.. ولا هوا يحبهم..))
سامر: اها تبغيني يعني أخدمك؟؟
فتحت عيونها.. وأنذهلت من افكارو..: سامر هذا جميل ما راح أنساه لك!
سامر: ومن فين لك الفلوس..؟؟
وعد: من فلوس أبويا.. معايا بطاقتو ورقم حسابو.. (وعينها تدمع) ما قصر قبل وفاته الله يرحمو أداني كل شي.
سامر وهوا يلف وجهو للجهة الثانية ما يبا يشوفها وهي ضعيفه: خلاص طيب معني واثق بأنك مارح تعرفي تعيشي لوحدك!
وعد: وليه إن شالله؟؟
سامر بعدم اهتمام وبدون ما يطالع فيها: شي معروف.. بنت تعيش لوحدها بشقه في السعوديه ولا عندها سواق ولا شي..
ما هتمت وعد كثير بكلامو .. ورجعت تقلب في المجلات قدامها..
.
.
وقفو بلندن..

سامر: هيا إحنا بمطار لندن ألحين..
وعد: اوكي..
نزلو ومشيو ووعد كانت متوتره حدها .. بمشي سامر جنبها.. وصلو وراحو للاستراحه.. تركها سامر وراح للاستقبال يوقع وصلوهم ومدري إيش..

وعند وعد.. كانت تحس نفسها ضعيفه.. ليه تقاوم نفسها وتوهم العكس ليه.. إلي صار لها مو سهل.. مو سهل إنك تسير وحيد لا سند ولا احد تستند عليه.. وسامر.. سامر إلي ظهر فجأه.. ما اهتم ولا راعاها.. بس يجرح فيها ولا همه حتى مشاعرها.. ولا اهتم حتى بوفاة عمه.. طنشت التفكير فيه وقلبت مواجها.. إلين شافته جايلها..

سامر وقف عندها: وعد تبي شي اشتريه لكي.. ولا تشتري إنتي؟؟
استغربت اهتمامه: لا شكرا ما ابا شي..
سامر بإنزعاج: وعد بلا دلع كانت الرحله طويله اكيد بتجوعي.. لان حتى الاكل إلي قدموه ما اخذتي منه شي..
استغربت اكثر إنه كان يراقبها حطت يدينها على خصرها: ليه إن شالله تراقبني..!!
سامر ابتسم بتريقه: هههه اقووول.. صحنك يمر من قدامي شايفتني اعمى.. ياللا ياللا اشتريلك شي..
وعد كشرت فـ وجهه ولفت عنه بعناد: ما ابغاا..
سامر ببرود: طيب..
استغربته ألتفتت عليه لقته راح.. اندهشت إنه استسلم على طوول حسبته إنه حيعاندها اكثر ويصر عليها.. شمقت وهي تطالع عليه وهو رايح وديها ظهره ورجعت تفكر وحست بطنها تقرقع من الجووع ضحكت على نفسها وانقهرت كمان من نفسها.. وعاد فشيله لو قامت تشتريلها ألحين..

بعد خمس دقايق ما تحس وهي مرخيه راسها إلا بصحن فيه كرسون وعصير ينحط قدامها.. استغربت ورفعت نظرها.. لقته... .. ســــامر..

سامر ببرود: ياللا جبته لكي.. كولي براحتك انا رايح..
وعد وهي رافعه حواجبها: بس..
وإلا ما استنى يسمعها اكثر شافته راح عنها وطنشها.. انقهرت بس فـ الاخير فرحت ((خخخخ على إيش تقااومي يختي اعترفي إنك جيعاانه))
اكلت بهدوء ولما شبعت اخذت الصحن الورق بسرعه ورمته في الزباله –الله يكرمكم- علشان سامر ما تلقطه عيونه ويضحك عليها.. ضحكت على نفسها وعلى حركاتها.. واستنت رحلتهم الثانيه..

اعلن عن رحلتهم لجده..

قامت ولفت بنظرها تدور سامر.. كانت فـ قلبها تشكر ربها إنه جا معاها سامر.. لأنها في الحقيقه.. إلي تخدع نفسها ولا تعترف فيها.. إنها ما تعرف تتصرف بنفسها في المطار.. وعلشان كذا احسن جا معاها سامر..

طالعت شوي إلا تشوفه جاي وهو مشغول يقلب فـ جواله.. ما تدري ليه حست بغصة.. استنكرت نفسها ولفت الجهة الثانيه.. جا لحدها ومشيو للطياره..
ركبو بهدوء وراحو لمقاعدهم وهما ساكتين..
بعد ما جلسو.. سامر ألتفت لها مبتسم بسخريه: اكلتي غداكي؟؟
وعد شمقتله: ما لك شغل!!
سامر: هههه اقول ما تضحكي علي فاهمه..!
وعد طنشته وقعدت تتأمل الغيوم من طاقتها.. كانت جميله بشكل.. "آآه يا ليتني اعيش في السما.. وربي اكون اسعد إنسانه.. خخخخ إيش سارت احلامي هبله.. مثل الاطفال.. خخ"

شوي ولا جابولهم عصير..
سامر طلب عصير تفاح.. واعطته المضيفه وطالعت تسألها تبا شي...
سامر قبل لا تتكلم وعد: not to need things((ما تحتاج شي))
وعد انقهرت منه وعاندته وطلبت من المضيفه juise orange
اعطت المضيفه العصير لسامر يعطيها هو ((على بالها إنه زوجها خخخخخ..))
وسامر بدون إهتمام مرره لوعد إلي لما جات تاخذه يدها بدون قصد جات على يده إلا وعد ما تدري ليه سحبت يدها بسرعه مرتبكه والعصير .. طـــــــآآآح
وطبعا وجهها راح طمــــاطـــــم.. وحآآآآآآر.. والله إنها تمنت إن الارض تنشق وتبلعها ذاك الوقت..
سامر عرف إنها انحرجت وما بغا يزيدها ما يدري ليه حن عليها.. بس في الاخير ما قدر يمسك لسانه: إلي يشوفك يقول يدي كلها اشواك..!!
هنا وعد خلاااص انحرجـــــت اكثر ما بقي إلا لسانه.. اكيــــــد هذي فرصه ما راح يفوتها يتريق عليها.. "آآآخ منك نفسي اشوف فيك يوووم!!"
وعد انحرجت ولفت وجهها.. والمضيفه جابت إلي مسح العصير ونظفه.. وبعدها سامر طلب منها عصير ثاني.. وألتفت لوعد مبتسم: ها تبي ولا توبتي ((وقسم بالله نذل..))
وعد ما تدري ليه عاندته زياده: إلا أبغى..
ضحك واخذ من المضيفه العصير ولما جا بيديها فك الطاوله إلي قدامها من غير ما يكلمها وحط لها العصير..
((وهي عاد اسألو عنها ولا تقصرو.. خخخ))
سكتوو ... وكل منهم لاهي بنفسه سامر نام على ورا.. ووعد قعدت مع احلامها في الغيوم.. تتطالعها بتأمل.. شوي تنام.. وشوي ترجع تحلم.. وشوي سرحانه..

وأخيرا وصلو لمطار جده..
.
وعــد (وهي مغطيه وجهها بالطرحه من ساعه) : اوووف وربي تعب..!
سامر ولا كأنه سمع شي شال الشنط وحطها بالعربيه واتجه لتاكسي و وعد وراه.. وركبو واتجهو لبيت خالها..
.
.
لحظات و وعد خايفه.. خايفه من اللقاء مع أهل خالها.. وهي تعرف شدتهم معاها.. "بس آآآه لو يعرفو قد إيش أنا محتاجتهم.. بس لا لا.. لا يمكن أعترف بأحتياجي لأحد.. حاجلس عندهم إلين ما يحجزلي سامر شقه.. بس إن شالله ما يطنشني ويروح! المهم ألحين كيف حيقابلوني.. كيـــف؟؟"
.
...: وصلنا..
كان صوت سامر هذا إلي أيقظها من سرحانها وتفكيرها..
وعد: ياللا .. (ونزلت من السياره.. ورجعت تلتفت له) بالله عليك لا تنسى إلي طلبتو منك!
سامر: اوكي اوكي خلاص فكينا..
وعد بعصبيه: سامر لو ما تبا .. خلاص.. حأتصرف أنا..
سامر أبتسم بسخريه: لا يا شيخه.. اقول ياللا أتوكلي.. (قصده تدخل البيت)
وعد طالعته بنظره ناريه وأتجهت للبيت وهوا طنش.. وقعد يشيل الشنط بصمت..
.
.
ترن ترن ترن

بعد ما دقت الجرس وقفت تنتظر.. وهي تدافع كل تردد وخوف.. وتقول لنفسها إنو مو هيا إلي تخاف.. أبدا.. "وعد دايما الشجاعة الواثقة من نفسها"..(وابتسمت بارتياح من عبارتها الاخيره هذي)..
وعد كانت تحمل نفسها اكثر من طاقتها.. وتقوي نفسها بقوة وهميه.. بس علشان تثبت قدام الناس!!
... : مين؟؟
صوت بنت من الانترفون..
وعد ما حبت تقول اسمها من البدايه وقالت بثقة: فكي الباب وتعالي علشان تعرفيني..
... : يؤ ؟؟؟ .. خلاص جايه.. (كانت سمر صاحبة الصوت ولما سمعت صوت بنت قالت أروح واشووف)
.
دقيقتين والباب ينفتح..
دخلت وعد بهدوء.. وشالت الطرحه عن وجهها..
سمر متفاجئة: ...!!!
وعد مبتسمة: سمر!
((::توضيح:: وعد عرفت سمر لأنها هي الوحيده في بيت خالها بهذا السن ..))
سمر بتردد: إنتي مين؟؟
وعد: معقول ما عرفتيني؟!!
سمر بدهشة وحواجبها إنعقدت: !!!!!!!!!!
وعد: ما تذكري .. وعد..؟
سمر: مو معقول!!
وعد ابتسمت.. وقالت لنفسها.. "كل إلي يسير في الدنيا هاذي مو معقول..!"
سمر: وعد؟؟؟؟!
حركت وعد راسها بالإيجاب.. وهي مبتسمه..
أندفعت سمر بقوة على وعد إلين بغت تطيحها .. وهي تضحك وتبكي بنفس الوقت.. وعد حضنتها بقوه وهي تمسح على ظهرها وتضحك..
وعد: خلاص ههههههههه
سمر وعيونها تدمع: هههههههههههههه ما تخيلت إني حشوفك.. إلا بعد ثلاثه سنين زي ما قال أبوكي لابويا..
وعد تذكرت ابوها وعينها بدت تدمع: الله يرحمو..
سمر أتفاجأت ولسانها اتربط: ...!!!؟؟
وعد ما قدرت تقول بس ملامحها كانت واضحه وخاصة دموعها إلي مثل السيل على وجهها..

. . صمت لمدة ثلاث دقائق . .

انقطع بدق عـ الباب..
سمر تلتفت لوعد متسائلة: ..؟
وعد تلتفت للباب: سامر دقيقة..(وألتفتت لسمر) سامر بيدخل شنطي..؟
سمر متفاجئة ومندهشة مــــــــره: سامـــــــــر؟؟؟
وعد: هيّا هيّا ندخل.. بعدين اقولك..(ومسكتها مع يدها ودخلو)
في المدخل..
سمر: وعد.. وضحي لي الموضوع؟؟
وعد: بعدين .. فين خالي ومرت خالي..
سمر: طيب دقيقة ..
.
.
سمر: مـــــــامــــا .. بــــــابــــــا..
ام حسام: بنت بلا رجه.. ابوكي يبا يرتاح..
سمر زي الصاروخ جريت وسحبت امها إلين عند ابوها.. وهما متفاجئين منها.. امها رافعه حواجبها .. وابوها يسألها : إيش فيـــــه؟؟
سمر: وعــــــد..
أم حسام وأبو حسام في نفس الوقت مندهشين: وعـــــد..!!
سمر: ايوا وعد بنت عمتي ..
ام حسام: بنت اتكلمي كويس عرفناها بس اش فيها..؟؟
سمر ألقت نظره على ابوها المتفاجيء ورجعت طالعت على امها بنظره كسيرة وقالت: وعد هنا..
ابو حسام: إيـــــــــش..؟؟
ام حسام: اش بك يا بنت وعد فأمريكا.. إيش جايبها هنا..
سمر: والله البنت هنا وفمدخل البيت كمان.. تعالو شوفوها.. وحتتفاجئو أكثر لو عرفتو أنو سامر ولد عمها عبدالله هوا إلي جابها..
شهقت أم حسام.. وابو حسام عقد حواجبو بطريقه قويــــه.. منصدميـــــن!
سمر: تعالو البنت تستنى.. وأسألوها بنفسكم..
أم حسام: يا بنت لا تكذبي ولا تلعبي .. إيش هاذي الهرجه الي مهي مفهومه؟؟
سمر: والله ما أكذب وقسم بالله أنو وعد افـ بيتنا..
ابو حسام قام على طــــول وراح للمدخل.. وام حسام قعدت شوي تطالع فسمر بشك.. وبعدها لحقت زوجها..
.
.
عند المدخل..
وعد واقفه بصمت.. سرحانه لبعيــــد.. لأبوها وذكرياتها معاه.. بيت خالها جنح بيها للورا.. افتكرت ايام ما كانت تجي عندهم وابوها هوا إلي يجيبها لهم.. "آآآه يااارب رحماك.."
.
ابوحسام: وعـــــد!؟!!
ألتفتت لخالها: خالي محمد!
أتقرب منها وهوا مو مصدق.. مسح على راسها بحنان: بنتي.. وعــد.. مني مصدق!
نزلت الدموع بارده على خدود وعـد بعد ما سلمت عليه.. ما عاد بقيت لها من الحراره إلي يدفي دموعها.. أصبح كل شي بالنسبه لها.. بــــارد..
((::توضيح:: وعد مو من النوع إلي يظهر ضعفه.. يعني حتى حظن لعمها ما قريتله وحظنته.. ابـــدا.. كانت واقفه بشموخ إلي يكابر الآمه.. أما عمها فأكتفى بمسح راسها ليظهر الحنان.. لأن هذا حدوده.. وعلاقته بوعد بنت اخته..))
قربت منها أم حسام: حبيبتي وعد.. كيفك ماما؟؟
قربت وعد منها مبتسمه تسلم عليها: الحمدلله على كل حال..
ام حسام: بسم الله عليكي.. اش فيكي؟
سكتت وعد ما قدرت ترد.. : ..
ابو حسام: وين ابوكي؟؟
وعد وهي خلاص بتنهار بس قاومت.. هذا السؤال إلي خافت منو.. وكانت بنفس الوقت تنتظره: بابا... بابا مـ ـ ـاتـ
بعدها وعد سارت تنشج وتبكي بس بهدوء وصمت كانت ضامة كل جروحها في وجدانها تخبيها ما تبا تظهر لأحد.. ما تبا شفقة من احد ولا عطف.. لأنها وعــــد .. وعد بشموخها وعزتها..
قربت منها أم حسام وحظنتها بخفيف وبدون حميمية الام لأنه طول عمرهم وفي حدود بين وعد وهما.. اما ابو حسام فكان واقف.. عاجز يستوعب.. ابوها فهد ما كان عزيز عليه بس مهما كان.. له ذكريات معاه.. بينهم عيش وملح.. واصلا هوا اقرب واحد في العيله له.. مع أنه بعيد عنه بنفس الوقت.. لأن فهد ما كان له أحتكاك فـ العايله ابدا يدوب هوا يكلمه من وقت لوقت.. وحتى وعد قبل ما يسافر كان لما يجيبها عندهم يحطها ويروح.. حتى سلام بالقطاره..! واصلا بينهم كلهم حزازيات صعب تنمحي..!
.
.

أما سامر فحط الشنط في الحوش.. وخرج.. ما كان يشوف إنه في وقت يسلم على أحد.. اصلا اكيد ألحين الكل مشغول بوعد.. راح واستأجر شقه له.. يبات فيها ذيك الليلة..
دور شقه ولقا وحده تمشي الحال.. دخل واخذ له دش.. وطلع شاف جواله يرن..
سامر: هلاا حمادا
احمد: مرحبا سامر ها وصلت!
سامر: مراحب ايوا انا فـ جده ألحين
احمد: ماشالله بهذي السرعه..
سامر: لأني على طول اخذت بنت عمي.. ونزلنا..
احمد: اهاا متى راجع لنا ان شالله
سامر: ليسع يا احمد بشوف الامور ألحين وبعدين بفكر
احمد: اوووكي حبيبي انتبه لنفسك..
سامر: ان شالله.. سلم لي عـ الجميع..
احمد: يوصل إن شالله فمان الله
سامر: فمان الكريم

((::توضيح:: طبعا بتسألون مين احمد.. هذا واحد من خيلانه(اخوان امه).. في المدينه.. وحيجي ذكرهم بعدين..))

، ،

إيش إلي بين وعد وأهل امها علشان يسبب هذي الحزازيات ويبني هذي الحدود؟؟
ويا ترى هل لسامر علاقة في ذا الشي؟؟
وإيش الحكاية اصلااا وإيش بينهم وبين ابو وعد؟؟
وهل حيأثر على حياة وعد عندهم ألحين؟؟
والشقة إلي هي ناويه تنقل فيها.. حل حيصير هذا الشي ولا يحدث شي يمنعها عنه؟؟
وسامر.. وين موقعه في ذي الاحداث؟؟
وهل حتتغير معاملته لوعد؟؟
وسمر إيش قصتها هي ومهند؟؟ وإيش حيصير بعد رفضها له بعد عدة مراات خطبها فيها..؟؟
وحسام وحبه البريء لوعد هل حينساه بسرعه ولا لما يشوفها تقلب المواجع؟؟
دموع من زجاج.. وقلووب صدأة .. والاحداث في تغير..